Desde o CIXUG estamos xa a preparar unha nova edición, que será a cuarta, do curso de Posgrao de Especialización en Orientación Laboral, adaptando e actualizando os obxectivos, contidos, materiais e actividades ao novo contexto do mercado laboral en xeral, e da orientación laboral en particular.
Como en edicións anteriores, prevese que o curso se desenvolva en modo blended learning, combinando teleformación a través da plataforma propia do CIXUG, con sesións presenciais en horario de fin de semana (venres pola tarde e sábados pola mañá) ata completar os 26 créditos ECTS dos que consta, equivalentes a 650 horas, estruturados en catro grandes módulos:
- Módulo 1: marco conceptual
- Módulo 2: marco persoal
- Módulo 3: marco instrumental
- Módulo 4: proxecto final
Como nos anos anteriores, os contidos relacionados coas novas tecnoloxías, o uso de Internet e das redes e ferramentas sociais para a procura de emprego, para o acompañamento das persoas demandantes desde os labores de orientación laboral e para o traballo colaborativo en rede terán unha importancia nuclear e cun enfoque eminentemente práctico, o que requirirá de acudir ás sesións presenciais cun dispositivo portátil (preferentemente computador) para un óptimo aproveitamento.
Xunto con estes, destacarán os relacionados coa adquisición do perfil competencial e das metodoloxías e técnicas para o desenvolvemento do labor de orientación laboral día a día con diferentes perfiles de persoas usuarias, así como os relativos a adquirir os coñecementos necesarios para poder prestar un apoio básico ás persoas orientadas que se decanten polo emprendemento e á economía social.
Este curso, que dará dereito á obtención do titulo de Especialista Universitario en Orientación Laboral, é único en España polas súas características, xa que reúne de xeito integral nun único curso de posgrao de carácter práctico e especializado as mellores prácticas no ámbito da orientación laboral, xunto coas competencias e as ferramentas tecnolóxicas necesarias para permitir ao persoal dedicado á orientación laboral aplicalas no seu día a día con garantías de máxima utilidade.
Se tes interese en que che traslademos toda a información sobre esta nova edición do curso en canto estea dispoñible de xeito oficial, déixanos os teus datos de contacto no formulario dispoñible no seguinte enlace.
