Os compañeiros de Galpon van realizar o próximo 22 de febreiro (sábado) un obradoiro do software estatístico R, dentro do ciclo Sábados libres na Altamar.
Vai ser o primeiro de dous obradoiros prácticos para dar a coñecer o funcionamento desta ferramenta libre de uso moi estendido nos ámbitos científicos e de investigación. O obradoiro vai ser dirixido por Miguel Branco, membro activo de Trasno e da comunidade de software libre galega, e que está a traballar como investigador no Depto. de Ecoloxía e Bioloxía animal, da Universidade de Vigo.
A inscrición para o curso está limitada a 24 prazas, polo que se recomenda a toda persoa interesada, envíe canto antes o formulario de inscrición. A día de hoxe, xa están cubertas a metade das prazas dispoñibles.
Para consultar máis información sobre o obradoiro, pode consultarse a wiki de Galpon, ou seguir as novidades a través do evento en Google+.
R é un software, multiplataforma, orixinalmente deseñado para a análise estatística e a realización de gráficos que, nestes intres, estase a utilizar en numerosos campos relacionados, dun ou outro xeito, coa estatística (xenómica, biomedicina, econometría, big data, bioloxía…). R ten unha dobre natureza de programa, e de linguaxe de programación, e distribúese baixo unha licenza GNU/GPL.